Sirf tin tula suna ho uske alawa koch bhi male zakat na ho to kiya us par zakat wajib hogi ya nahi____صرف تین تولہ سونا ہو اس کے علاوہ کچھ بھی مال زکوٰۃ نہ ہو تو کیا اس پر زکوٰۃ واجب ہوگی یا نہیں؟؟

‭‮‭‮صرف تین تولہ سونا ہو اس کے علاوہ کچھ بھی مال زکوٰۃ نہ ہو تو کیا اس پر زکوٰۃ واجب ہوگی یا نہیں؟

السلام علیکم ورحمتہ اللہ وبرکاتہ

کیا فرماتے ہیں علمائے دین و مفتیان شرع متین اس مسئلہ کے بارے میں کہ زید کے پاس صرف تین تولہ سونا ہے اس کے علاوہ کچھ بھی نہیں جتنا کماتا ہے کھا پیکر برابر ہوجاتا ہے تو کیا اس تین تولہ سونا پر زکوٰۃ واجب ہے یا نہیں۔ اگر مارکیٹ میں بیچنے جائے تو چاندی کی نصاب سے بڑھ جائے گا 

سائل : بندئہ خدا 

〰〰〰〰〰〰〰〰〰〰〰〰

وعلیکم السلام ورحمۃاللہ وبرکاتہ

الجواب بعونہ تعالیٰ

صورت مسئولہ میں صرف سونا ہی ہو اور سونے کے علاوہ کوئی مال زکوٰۃ چاندی، تجارت کا سامان اور رقم وغیرہ بھی نہ ہو مگر سونا بیچنے سے ساڑھے باون تولہ چاندی کی قیمت تک پہنچ جائے تب بھی شخص مذکور پر زکوٰۃ فرض نہیں،قیمت کا کوئی اعتبار نہیں چاہے کم ہو یا زیادہ۔ کیونکہ زکوٰۃ فرض ہونے کے لئے نصاب کا مکمل ہونا شرط ہے اور سونے کا نصاب ساڑھے سات تولے ہے۔ تنویر الابصار مع در المختار میں ہے : نصاب الذهب عشرون مثقالا، و قيل يفتي في كل بلد بوزنهم، والمعتبر وزنهما أداء وجوباً و لا قيمتهما" ترجمہ : سونے کا نصاب بیس مثقال ہے، اور کہا گیا ہے کہ ہر شہر میں ان کے وزن کے اعتبار سے فتویٰ دیا جائے گا، زکوٰۃ کی ادائیگی کے واجب ہونے میں دونوں کا وزن معتبر ہوتا ہے دونوں کی قیمت معتبر نہیں ہوتی۔(ج 3/ کتاب الزکاۃ، باب زکاۃ المال، صفحہ 224/227)اسی میں ہے: و سببه أي سبب افتراضها ملك نصاب" ترجمہ : زکوٰۃ فرض ہونے کا سبب مالک نصاب ہے( ج3/ کتاب الزکاۃ،صفحہ 173) فتاویٰ رضویہ میں ہے: سونے کی نصاب ساڑھے سات تو لے ہے اور چاندی کی ساڑھے باون تو لے۔( جلد 10/ صفحہ 85) بہار شریعت جلد اول میں ہے: سونے کی نصاب بیس ۲۰ مثقال ہے یعنی ساڑھے سات تولے اور چاندی کی دو سو ۲۰۰ درم یعنی ساڑھے باون تولے یعنی وہ تولہ جس سے یہ رائج روپیہ سوا گیارہ ماشے ہے۔ سونے چاندی کی زکاۃ میں وزن کا اعتبار ہے قیمت کا لحاظ نہیں،مثلاً سات تولے سونے یا کم کا زیور یا برتن بنا ہو کہ اس کی کاریگری کی وجہ سے دو سو ۲۰۰ درم سے زائد قیمت ہو جائے یا سونا گراں ہو کہ ساڑھے سات تولے سے کم کی قیمت دو سو درم سے بڑھ جائے، جیسے آج کل کہ ساڑھے سات تولے سونے کی قیمت چاندی کی کئی نصابیں ہوں گی، غرض یہ کہ وزن میں بقدر نصاب نہ ہو تو زکاۃ واجب نہیں قیمت جو کچھ بھی ہو۔( حصہ 6/ صفحہ 902)۔

وﷲ سبحٰنہ وتعالیٰ اعلم

〰〰〰〰〰〰〰〰〰〰〰

کتبــــــــــــــــــــــــــــــــہ_ 

حضرت مفتی محمد مظہر حسین سعدی رضوی صاحب قبلہ مد ظلہ العالی والنورانی،خادم سعدی دار الافتاء، متوطن: نل باڑی، سوناپور ہاٹ، اتردیناجپور، ویسٹ بنگال، الہند

*21/ رمضان المبارک 1442ھ* 

*4/ مئ 2021ء*

 *_رابطــــہ نمبــــر📞 8793969359☎*_ 

〰〰〰〰〰〰〰〰〰〰〰〰